Kaszëbskô Wëdowiédnô Starna

Mùzeùm Kaszëbskò-Pòmòrsczi Runitwë ë Mùzyczi w Wejrowie ë Kaszëbsczi Institut we Gduńskù rôczą serdeczno na promòcëjã ksążczi Jana Rompsczégò “Kaszëbsczé Dramë” wëdóny w rédze Bibloteka Kaszëbsczich Runitów dzél 4.

Pòtkanié bãdze miało swój plac 12 strëmiannika 2010 r. (piątk) ò gòdz. 17.00 w sédzbie Mùzeùm w Wejrowie przë Zamkòwi 2a (Pałac Przebendowsczich – Keyserlingków)

(wicy…)

Dzéń Jednotë Kaszëbów to swiãto ùsôdzoné dlô pamiãcë ò pierszim pismionie w jaczim pòkôzalë sã Kaszëbi z 19 strëmiannika 1238 rokù – jidze tuwò ò wëstôwiony przez papiérza Grégora IX dla ksyżëców Zapôdny Pòmòrsczi titel „dux Slavorum et Cassubia” (ksyżëc Słowiónów ë Kaszëbów). Negò titla brëkòwôł ksyżëc Barnim I (1210 – 1278).

Pierwszi Dzéń Jednotë Kaszëbów miôł swój plac 19 strumiannika 2004 rokù we Gduńskù, a òd 2006 rokù, dzãka aktiwnocë Mareka Wantoch-Rekowsczégò, zbògacono gò wespólnym mùzykòwaniém akòrdéònistów (ni le blós z Pòmòrsczi).

Latosy Dziéń Jednotë Kaszëbów ë nôslédnô próba ùstanowieniô rekòrdu Pòlsczi w równoczasnym graniu na akòrdéònie bãdze 21 strëmiannika w Kartuzach. Przédné swiãtowanié bãdze w Karnie Òglowòsztôłcących Szkòłów nr 2 w szëdlëcach Wëbicczégò.

(wicy…)

ZYMK (Zéńdzenié Młodëch Ùtwórców Kaszëbsczich) rôczi w sobòtã 14 lëstopadnika 2009 rokù ò gòdz. 16.00 na pòtkanié z nôlëżnikama negò kaszëbsczégò lëteracczégò karna, chtërné bãdze miało swój plac w Gimnazëjóm miona Kaszëbsczich Runitów w Lëzënie.

Wicy ò ZYMKù (nôlëżnikach ë jich ùsôdztwie) nalezéta na domôcych starnach ùdbë: zymk.net

Gduńsk promòwóny w kaszëbsczim jãzëkù

Gduńsk dożdôł sã nôslédny starnë w kaszëbsczim jãzëkù – je to strana promùjącô Gduńsk do miona Eùropejsczi Stolëca Kùlturë na rok 2016, chtërną zdolmaczëł Wasta Zbigniew Jankòwsczi.

Samô dejô integracëji nôrodów Eùropë przez promòwanié kùlturë ji òbéńdów Eùropë zrodza sã w 1995 rokù. Terô wëbierónë są dwie stolëce, jednô z państwów przódny EÙ, a drëgô z nowo do ni doszłech ë tak 2016 rokù wëbróny bãdze jedn gard ze Szapńsczi, jakno ë drëdżi z Pòlsczi.

Czegò dërch nama felëje w tich pòdjimiznach (tikô sã to téż domôcy starnë Gduńska ò jaczi ma pisalë łoni) to czile prostich nowinów w kaszëbsczim jãzëkù, przez co mómë starnë pò kaszrbskù równak dali le prakticzno staticzné, a ni żëwé, starnë. Nimò tegò je to gwës jaczis pòsobny krok w przódk w promòcëji kaszëbsczégò jãzëka w sécë.

Medalia Stolema (zdrój: http://www.pomorania.pl)

28 maja ò gòdz. 18:00, w Stôrogardowim Rôtuszu we Gduńskù, przë Kòrzenny 33/35, òstaną nadóné wëprzednienia Medalia Stolema, chtërné latosy dobëlë: Ida Czajinô ë Róman Drzéżdżón.
Medalia Stolema to wëprzednienié jaczé przëznôwô sztudansczi klub Pomorania òd 1967 rokù ë dobowają jã lëdze czë téż òrganizacëje, chtëné na òsoblëwi órt przëkłôdają sã do rozwiju ë pòpùlarizacëji kùlturë Pòmòrzczi, w tim Kaszëb.

Szkólnô Ida Czajinô je kaszëbską pòétką, jakô debiutowa  w 90-tich latach w czãdnikù Tatczëzna.

Róman Drzéżdżón je kaszëbsczim pùblicystą, ùsôdzcą felietonów ë pòézëje, jaczi robi w Mùzeùm Pùcczi Zemi.

Sztudańcczi Nobel 2009

Do kònkùrsu Sztudańcczi Nobel, realizowónégò przez Samòstójné Zrzeszenié Sztudańtów Gduńsczégò Uniwersytetu (Niezależne Zrzeszenie Studentów Uniwersytetu Gdańskiego) ë stôwiającegò sã  za zgrôw promòcëjã sztudańcczich òsobòwòsców, przëstãpiło piãc pòmòrsczich ùczbòwniów. Westrzód przëszłëch zgłoszeniów, wzérając na: ùczbòwé dobëca, spòlëznianią aktiwnotã, spòrtowé ë artizniané dobëcô ë charitatiwną robòtã, wëprzédniono w Gduńsczi Pòmòrsce 56 sztëk lëdzy.

Nôdgrodniczką latoségò kònkùrsu òsta Kaszëbka: Hana Makùrôt, absolwéntka pòlsczi filologijë, sztudańtka slawisticzi, rusczi filologijë ë filozofijë.

(wicy…)

Verba Sacra - Kaszëbskô Biblëjô w Wejrowié

19 stëcznika ò 17:00 wieczór, w wejrowsczi Kòlegiace (Fara) , w òbrëmieniu cyklu Verba Sacra – Modlëtwë pòlsczich katédrów, bãdze mia swój plac kaszëbskòjãzëkòwô prezentacëjô Ewangelëji wedle sw. Matéùsza.

Ùsôdzcą dolmaczënkù ë równoczasno ewangelëcczich dopòwiesców je (znóny ju z rëchliszëch dolmaczënków Nowégò Testameńtu Nowego ma kaszëbsczi jãzëk) o. Adam Ryszard Sikòra OFM. Na zéńdzeniu w Wejrowié, wëjimczi Ewangelëji pò kaszëbskù, przedstôwi Danuta Stenka, a dopòwiescë do tegò przińdą òd prof. Jerzegò Trédera ë o. Adama Riszard Sikòrë.

Verba Sacra je ùdbą ùsôdzôwòną òd 2000 rokù, a ji deja je przëszłô òd reżiséra Przemysław Basiński.

Aùtorama mùzyczi Verba Sacra 2009 są Tadeùsz Korthals (Northstudio) ë Cyprian Wieczorkòwsczi (Lud Hauza).

(wicy…)

10 stëcznika 2009 rokù we Gduńskù do Przédny Bibloteczi Gduńsczégò Ùniwersytetë na finał XXII Kònkùrsu Wiédzë ò Pòmòrsce, òrganizowónegò przez Sztudersczé Karno “Pomorania”,  przëbëło 86 ùczniów z 31 wëżigimnazjowich szkòłów całownégò Pòmòrsczégò Wòjewództwa. Bëlë téż ti, chtërni z westrzód 500 sztartëjącëch w szkòłowim etapie dobëlë nôlepszé wińdzenia.

Finał òstôł rozpartérowóny na dwa dzéle: w pierszi ùczniowie rozwiązëwólë test wëbiérkù, juwerno jakno w slédnych trzech latach zrechtowóny w dwóch jãzëkach – pòlsczim ë kaszëbsczim. Do drëdżegò – mòwnégò dzélu – je przeszłé dzesãc sztëk lëdzi z nôlepszima wińdzeniama z testu.  Terô to òni mùszelë wëkôzac sã wiédzą òdpòwiôdając przed Jury na trzë pëtania, pò jednym z lëteraturë, geògrafiji ë historëji Pòmòrsczi.  Jury w skłôdze: dr Marek Cybulsczi, prof. UG Jan Wendt ë mgr Andrzej Hoja pò òbsądzeniu wëpòwiesców finalowników wëbrało przédnégò dobëtnika. Òstôł nim  Wiesław Mielewczyk z Òglowòsztôłcącégò Liceùm miona Jana III Sobiesczégò w Wejrowié.

(wicy…)

Remùs òżëł!

Aleksaner Majkòwsczi (1876 -1938)

A stało sã to w Lëzënie 8 gòdnika Pansczégò Rokù 2008, jaczi to je równoczasno rokã Aleksandra Majkòwsczégò. Zesëmòwanié tegò rokù wëpadło w kaszëbsczi òbéńdze bez wikszich rewelacëjów, równak slédné imprezë w naszim krézu ùprawniono zwikaszją roczną srtrzédną. Pòniedzałkòwô ùroczëzna w Pùblicznëm Gimnazëjum miona Kaszëbskò-Pòmòrsczich Runitów w Lëzënie, to je rozwiązanié plasticznegò ë lëteracczégò kònkùrsu na témã „Żëcô ë przigòdów Remùsa”, zrëszëła òbéńdã, zebrała wiele lëdzy do grëpë ë sta sã wiôlgą zwënégą.

„Remùs – wiôldzi bëł to chłop,
Ale ùschłi jak ten snop.
Jegò wãps miôł samë łatë
I dzurawé nosył szatë.”

Tak napisa o heroju pòwiescë A. Majkòwsczégò w wiérzcë „Remùs” młodô pòétka ò pseudonimie „Perełka” – Ewelina Hébel z Lëzëna. Òsta òna téż jedną z wëprzédnionëch w kònkùrsë. Z całegò wòjewództwa przëszłé je jaż 78 wiérztów, z chtërnëch to piãc sztëk lëdzi z kòmisëji, jaczi prowôdnikã bëł Tomôsz Fópka, przëznało nôdgrodë dlô trzënôstu dokôzów w szterech kategòrëjach. Pierszi plac dobëlë: westrzód młodzéznë Kinga Serkòwskô z Kartuz, westrzód gimnazjalëstów Natalija Król z Lëzëna, westrzód  ùczniów szkół strzédnëch Adam Hébel z Lëzëna (LO w Wejrowie), a westrzód dorosłich Elżbiéta Bugajnô z Gòrãczëna. (wicy…)

W latosym kònkùrsé miona Jana Drzéżdżóna “Bë nie zabëc mòwë starków“, szło ùzdrzëc ë ùczëc 40 ùczniół ze 14 szkòłów pùcczégò krézu.

Nôddgrodë dobëlë

I kategòrëjô (klasë I-III spòdlecznëch szkòłów)

1. Andżelika Wach (Swôrzewò)
2. Paweł Hincka (Gniéżdżewò)
3. Sara Mùża (Mòstë)

(wicy…)