Kaszëbskô Wëdowiédnô Starna

Gduńsk 25 lëpińca – 1 zélnika 2010

Latosy Festiwal Zwãczi Nordë we Gduńskù,  mô przédny cësk na Norweskô – zamëkô òn równak w swòjim programie téż kaszëbsczé akcentë.

Westrzód gwiôzd wôrt je na gwës wëmienic Agnes Buen Garnås – wòkalistkã norwesczi fòlkòwi mùzyczi, znónô mòże nôbarżi z platczi z 1989 rokù Rosensfole nagróny do grëpë z Janã Garbarkã. Agnes Buen Garnås pòprowôdzy wòkalną warkòniã ë wëstãpi w ùdbie Syngende i et utvida Norden/ Songs of the extended North, chternô bãdze mia swòją permierã we Gduńskù.

Kaszëbsczima festiwalowima elementama Festiwalu bãdą m.jin. 25 lëpińca ò 19:00 wëstãpë karna Bùbliczczi, jakno ë 27 lëpińca prezentacëjô filmù R. Bera Kaszëbë.

Akùratną wëdowiédzã ò wszëtczich jimprézach  dobëjeta (pò pòlskù a anielskù) na domôcych starnach Festiwalu: dzwiekipolnocy.pl

Karno Sztudérów Pomorania rôczi na ùroczëznã przëznaniô Medaliów Stolema Òjcu Adamòwi Sykòrze jakno ë Zbigòrzowi Jankòwsczémù, chtërné bãdze miało swój plac 31 maja 2010 rokù ò gòdzënie 6 pò pôłnim w Stôrogardowim Rôtuszu przë Kòrzenny 33/35 we Gduńskù.

Wieczór zbògacą spiéwë Witosławë Frankòwsczi.

Medalia Stolema je przëznôwónô bez Karno Sztudérów “Pomorania” òd 1967 rokù ë stało sã jednym ze nôbarzi ùwôżónëch na Kaszëbach wëprzédnieniów.  Dobëwają jã lëdze czë téż òrganizacëje, chtëné na òsoblëwi órt przëkłôdają sã do rozwiju ë pòpùlarizacëji kùlturë Pòmòrzczi, w tim ji dzélã, chtënym są Kaszëbë.

Brateczno gratulëjemë wëprzédnionym!

* Òbrôzk: Medalia Stolema  – zdrój: http://www.pomorania.pl

Gduńsk promòwóny w kaszëbsczim jãzëkù

Gduńsk dożdôł sã nôslédny starnë w kaszëbsczim jãzëkù – je to strana promùjącô Gduńsk do miona Eùropejsczi Stolëca Kùlturë na rok 2016, chtërną zdolmaczëł Wasta Zbigniew Jankòwsczi.

Samô dejô integracëji nôrodów Eùropë przez promòwanié kùlturë ji òbéńdów Eùropë zrodza sã w 1995 rokù. Terô wëbierónë są dwie stolëce, jednô z państwów przódny EÙ, a drëgô z nowo do ni doszłech ë tak 2016 rokù wëbróny bãdze jedn gard ze Szapńsczi, jakno ë drëdżi z Pòlsczi.

Czegò dërch nama felëje w tich pòdjimiznach (tikô sã to téż domôcy starnë Gduńska ò jaczi ma pisalë łoni) to czile prostich nowinów w kaszëbsczim jãzëkù, przez co mómë starnë pò kaszrbskù równak dali le prakticzno staticzné, a ni żëwé, starnë. Nimò tegò je to gwës jaczis pòsobny krok w przódk w promòcëji kaszëbsczégò jãzëka w sécë.

Medalia Stolema (zdrój: http://www.pomorania.pl)

28 maja ò gòdz. 18:00, w Stôrogardowim Rôtuszu we Gduńskù, przë Kòrzenny 33/35, òstaną nadóné wëprzednienia Medalia Stolema, chtërné latosy dobëlë: Ida Czajinô ë Róman Drzéżdżón.
Medalia Stolema to wëprzednienié jaczé przëznôwô sztudansczi klub Pomorania òd 1967 rokù ë dobëwają jã lëdze czë téż òrganizacëje, chtëné na òsoblëwi órt przëkłôdają sã do rozwiju ë pòpùlarizacëji kùlturë Pòmòrzczi, w tim Kaszëb.

Szkólnô Ida Czajinô je kaszëbską pòétką, jakô debiutowa  w 90-tich latach w czãdnikù Tatczëzna.

Róman Drzéżdżón je kaszëbsczim pùblicystą, ùsôdzcą felietonów ë pòézëje, jaczi robi w Mùzeùm Pùcczi Zemi.

Sztudańcczi Nobel 2009

Do kònkùrsu Sztudańcczi Nobel, realizowónégò przez Samòstójné Zrzeszenié Sztudańtów Gduńsczégò Uniwersytetu (Niezależne Zrzeszenie Studentów Uniwersytetu Gdańskiego) ë stôwiającegò sã  za zgrôw promòcëjã sztudańcczich òsobòwòsców, przëstãpiło piãc pòmòrsczich ùczbòwniów. Westrzód przëszłëch zgłoszeniów, wzérając na: ùczbòwé dobëca, spòlëznianią aktiwnotã, spòrtowé ë artizniané dobëcô ë charitatiwną robòtã, wëprzédniono w Gduńsczi Pòmòrsce 56 sztëk lëdzy.

Nôdgrodniczką latoségò kònkùrsu òsta Kaszëbka: Hana Makùrôt, absolwéntka pòlsczi filologijë, sztudańtka slawisticzi, rusczi filologijë ë filozofijë.

(wicy…)

Part TVP we Gduńskù, Radio Gduńsk ë “Gazeta Wyborcza” òrganizëją w 31 stëcznika 2009 rokù w Dwòrze Artusa debatã na témã “Kim są Kaszëbi?”, jakô bãdze mia swój plac w rédze mùlimedialny debatë “Na dwa głosy”, redachtora Pawła Zbiersczégò.

W sobòtny debacé mają bëc przedstôwioné dwa czérënczi kaszëbsczi rësznotë: “tradicjowi” ë “mòderny”.

Emisëjô programë w TVP Gduńsk: 7 gromicznika ò gòdz. 18.50 – pòzdze téż do òbôczëniô na internetowi starnie TVP Gduńsk.

Radiowô retransmisëjô w Radio Gduńsk: 9 gromicznika ò gòdz. 20.00 z mòżnotą interfnetowégò òdbiéru.

10 stëcznika 2009 rokù we Gduńskù do Przédny Bibloteczi Gduńsczégò Ùniwersytetë na finał XXII Kònkùrsu Wiédzë ò Pòmòrsce, òrganizowónegò przez Sztudersczé Karno “Pomorania”,  przëbëło 86 ùczniów z 31 wëżigimnazjowich szkòłów całownégò Pòmòrsczégò Wòjewództwa. Bëlë téż ti, chtërni z westrzód 500 sztartëjącëch w szkòłowim etapie dobëlë nôlepszé wińdzenia.

Finał òstôł rozpartérowóny na dwa dzéle: w pierszi ùczniowie rozwiązëwólë test wëbiérkù, juwerno jakno w slédnych trzech latach zrechtowóny w dwóch jãzëkach – pòlsczim ë kaszëbsczim. Do drëdżegò – mòwnégò dzélu – je przeszłé dzesãc sztëk lëdzi z nôlepszima wińdzeniama z testu.  Terô to òni mùszelë wëkôzac sã wiédzą òdpòwiôdając przed Jury na trzë pëtania, pò jednym z lëteraturë, geògrafiji ë historëji Pòmòrsczi.  Jury w skłôdze: dr Marek Cybulsczi, prof. UG Jan Wendt ë mgr Andrzej Hoja pò òbsądzeniu wëpòwiesców finalowników wëbrało przédnégò dobëtnika. Òstôł nim  Wiesław Mielewczyk z Òglowòsztôłcącégò Liceùm miona Jana III Sobiesczégò w Wejrowié.

(wicy…)

Starnë Gduńska w kaszëbsczi wersëji - przédnô starna

21 lëpińca szło przeczëtac na starnach Kaszëbskò-Pòmòrsczégò Zrzeszeniô, że ju mòże òbôczëc starnë gdansk.pl w kaszëbskòjãzëkòwi wersëji.
Starnë òstałë ùsôdzoné przë wespółrobòce Ùrzãdu Garda Gduńska ë ZK-P (kòòrdinatorã bëł tuwò Jack Fópka), a dolmôczóma starnów bëlë: Róman Drzéżdżón Tomôsz Fópka, Zbigniew Jankòwsczi – jaczi zrobilë to za darmôka, co mëszlã, że je wôrt pòdsztrëchnąc, jakno ë to, że je to pierszô samòrządowô internetowô starna w kaszëbsczim jãzëkù.

Zamkłoscë są dolmaczënkama pòlsczi wersëji, a sóm dolmaczënk je (pòdle mie) tak przërëchtowóny, że wnet kòżdi (téż pòlskòjãzëkòwi czëtińc) mòże gò zrozmiec – jak dlô mie to kąsk felëje kaszëbsczich archaizmów, jaczé to baro zbògôcają kaszëbsczi jãzëk. Mòże przë ti lekturze dozdrzec téż, że je òna ùsôdzonô przez lëdzi z różnëch nórceków Kaszëb (zdrzë n.p.: òdemkłi ë òtemkłi) – co mie prawie nie przeszkôdzô, a nawetka zbògôcô starnë.
(wicy…)