Jãzëk czë gwara
Żukòwò - wies pańskô

Jãzëk czë gwara

Smãtk przesłôł do mie na pòkùsã trzech szkólnëch: dłudżiégò Grifelka ze Zabôczewa, cencziégò Piórkã z Klaksowa ë łëségò Rechùbkã z Głëpkòwa. 
- Rzeczë le nama, Mackù, dëcht tak prôwdzëwą prôwdã, żeli Kaszëbi mają jãzëk, czë le gwarã? 
- Kò tej le zdrzëta! - Ë wëwalił jem swój jãzëk bùten jak le dëcht szło. 
- Co za pëszny ë widzałi jãzëk! - zdzëwił sã Grifelk. 
- A taczi jãzëk chcą nazëwac gwara? - rzekł Piórkò. 
- Jãzëk jak szëpla. To wicy jãzor jak jãzëk, ale za gwarą nie szlachùje dëcht nick - zamrëczôł łësy Rechùbka. 
- A cëż wa terô ò tim mëslita? 
- Kò më ù ce w gãbie ùzdrzelë na jawie, że môsz dëcht bëlny jãzëk, a je dëcht czëstim, nie je òbłożony ani priszczëkem, ani bardówką, ani niżódną gwarą. Më téż mómë kòżdi swój, a kùreszce kòżdi Kaszëba mô swój jãzëk. Ale chtëż tej mô gwarã w pëskù? 
- Kò taczich so szëkôjta kãdës dalek, mòże na Kùrpiach abò na Góralëznie. 
- A jak takô gwara wëzdrzi? 
- To swiãti Pańsczi wiedzą. Mòże w tim cos je òd nadgrëzłégò jãzëka abò jaczis jãzëczk rozszczépióny na kùńcu jak ù żniji, abò wërzëtny jak ù żabë, abò... diôblë wiedzą! 

Chcemë le so zażëc!

początek

Żukòwò - wies pańskô

Żukòwò to wies pańskô. Bëła nią ju za czasów Swiãtopôłka Bëlnégò ë za Mszczëgów, òsta nią téż pò dzys dzéń ë nią bãdze na wieczi wieków. Amen. 
Ale cobe Żukòwianié bez tã chwalbã nie wnëkële w za wielgą bùchã, przënôlégò jima téż jaczis flëczk przëszëc. Taczëch flëczków móm dô nich czile. Jeden z nich je dëcht pasowny na pòrwóny jãzëk niechtërnëch bôb. A pòrwôł sã jima bez to, jiże rôd môłpùją cëzëch ë w cëzënie widzą wiedno co lepszégò niglë w bëlny swòjiznie. Jidącë bez Żukòwò czëjã jak jedna takô baba szkalëje na swojã żôrotną córeczkã:
- Tile razy czi gadam, ze masz mówicz doma i w szkole le pò pòlskù. A ti nie chczesz tego czucz, co czi mamusza radżi. To sobie wnykaj w ten twoj szadi łep! Gdi jeszcze raz bendã miała cziti, ze bendżesz z dżeczmi gadacz po kaszubsku, to czi szpéri uczidnã. Nie darwasz miszlecz, ze mamusza chce dla czebie licho, chcã dla czebie dobrze. Gdi bendżesz tak dobrze w szkole mówicz po polsku, jak twoja mamusza, tej bendżesz zbieracz dicht same piontki. 

Chcemë le so zażëc!

początek

Zobacz także w kaszubii:
100-lecie urodzin Aleksandra Labudy
Aleksander Labuda " Ewanielskô spiéwa" ( Poza prezentacją książki znajdziesz tu informacje o autorze)

Poza kaszubią:
Informacje o Aleksandrze Labudzie znajdziecie na stronach:
 Zasobów Kaszubsko - Pomorskich (http://www.zk-p.pl/leksykon/labuda.htm)