XXII Kònkùrs Wiédzë ò Pòmòrsce rozsądzony
Òpùblikòwóné w: Kùltura — Tadżi: Gduńsk, Pòmòrskô — Mark Kwidzińsczi @ 12:25 dp 16 stë. 2009 Dopòwiescë (0)
10 stëcznika 2009 rokù we Gduńskù do Przédny Bibloteczi Gduńsczégò Ùniwersytetë na finał XXII Kònkùrsu Wiédzë ò Pòmòrsce, òrganizowónegò przez Sztudersczé Karno “Pomorania”, przëbëło 86 ùczniów z 31 wëżigimnazjowich szkòłów całownégò Pòmòrsczégò Wòjewództwa. Bëlë téż ti, chtërni z westrzód 500 sztartëjącëch w szkòłowim etapie dobëlë nôlepszé wińdzenia.
Finał òstôł rozpartérowóny na dwa dzéle: w pierszi ùczniowie rozwiązëwólë test wëbiérkù, juwerno jakno w slédnych trzech latach zrechtowóny w dwóch jãzëkach – pòlsczim ë kaszëbsczim. Do drëdżegò – mòwnégò dzélu – je przeszłé dzesãc sztëk lëdzi z nôlepszima wińdzeniama z testu. Terô to òni mùszelë wëkôzac sã wiédzą òdpòwiôdając przed Jury na trzë pëtania, pò jednym z lëteraturë, geògrafiji ë historëji Pòmòrsczi. Jury w skłôdze: dr Marek Cybulsczi, prof. UG Jan Wendt ë mgr Andrzej Hoja pò òbsądzeniu wëpòwiesców finalowników wëbrało przédnégò dobëtnika. Òstôł nim Wiesław Mielewczyk z Òglowòsztôłcącégò Liceùm miona Jana III Sobiesczégò w Wejrowié.
Dobëtnicë dostalë wôrtné nôdgrodë, w tim cyfrową òdjimkòwą kamérã za dobëcé pierszégò placu, grôcze MP3 ë ksążczi z pòmòrska témą. Tegò dnia niżóden z bëtnków nie wëszed z bibloteczi z niczëm, a to ju sprawa sparłãczonô ze szczërotą tich, chtërni wspiarlë òrganizacëjã Kònkùrsu tegò rokù: Kaszëbskò-Pòmòrsczé Zrzeszénié, Gduńsczi Ùniwersytet, Kaszëbsczi Institut, Ùrzãd Gminë Srójkòwice, Krézowé Stôrostwò w Pùckù, Krézowé Stôrostwò w Wejrowié ë Òficyna Czec.
Dobëtnikòm gratilujemë ë rôczimë na drëdżi rok. Nôslédnô edicëjô Kònkùrsu Wiedzë ò Pòmòrsce ju w séwnikù 2009 rokù. Tich zôs, chtërni bãdą ju w tim czasu pò maturze, rôczimë téż do bëtnoscë, tim razã pò starnie òrganizatorów. (-)
Barbara Mudlaff
Dolm. Mark Kwidzińsczi
